Onser Fritzi, onser beschte Hund!


Onser Fritzi, onser beschte Hund!


„Holt ne, Vedr Hans, holt ne! Ich saan Eich, Ter werd et net bereie. Sei Mottr es so e gude Hund on de Hindche werd bestimmt noch besser“, hat de Puszta-Hieder gsaat on mei Vatr hat sich iwerrede geloss on hat ne hemgebrong. On well onser Hunne entwedr Bandi, Rudi, Fritzi odr Waldi ghäsch han, es de Klääne newer onsrem Baldi ewe Fritzi geruf genn. Er waar noch verspillt, wie alle junge Hunne, awer aa gelehrich, ohne dass mr ne dressiert häde.

Reinrassig waar ne net, awer weiß met große schwarze Flecke. De Baldi waar e Dackl, de Fritzi waar ausgewachs wie e Wolfshund so groß, awer wachsam, trei on kämpferisch. Wann ich als Khend met em of die Gass senn, hann die anre Hunne sich gfärcht, er hat se all aangeknurrt. Sogaar em Rossani sei Bernhardiner - e Koloss vum e Hund – hat ne en die Flucht gschlaa.
Awer onsrem Fritzi sei grescht „Begabung“ waar et Ratzefange, er hat se iwerall met seiner gut Naas geroch, hat gscherrt on gegraabt, bes ne se ghatt hat. Dromm es ne en dr ganz Nochberschaft als Ratzefänger romgereicht genn on alle Leit waare begeischtert.

Sei Meischterschteck awer hat ne bei Steinersch iwer die Gass am Eck gemach. Die haade ständich Unmus met de Ratze, hann awer net genau saan khenne, wo se hause. No hann mr de Fritzi suche gemach on de hat of me Platz zu scherre aangfang, wo khäne gedenkt hat, well dort jo alles zubetoniert waar.
On noh es beroht genn, was zu mache es: Soll mr dem Hund so stark vertraue, dass mr de Beton em Stall ofschlaat odr liewer net? On de Steiner es bes zuletscht iwerzeit geween, dass de Fritzi net falsch leit, dass er em zutraut, sogaar dorch de Beton die Ratze zu rieche. On so waar et aa!
Wie se et Loch ofgschlaa haade, senn dr Reih noh die Ratze em e Tempo rausghoppst, dass ne se nor em Gnack gebess on weggeworf hat. Es ään zu schnell komm, hat aa de Baldi em noch gholf, de wo aa am Loch gepicht hat.
On et es de Steinersch, em Dr. Haupt on all dene Leit, wo dort zammgelaaf waare, net zum Glaawe komm: 27 Ratze hat de Fritzi aus dem Loch gholl on waar de Held – heitzutaach Star des Tages.

De Dr. Haupt, de wo e aarich gude Tierarzt waar, hat vor Begeisterung nor saan khenne: „Wann dem Hund mol was passeert, khennt Tr mich aa om 3 Uhr en dr Nacht rufe, ich komm em helfe.“
Was ne aa 2mol glicklich hat khenne, well se ne vergift haade. Er hat nämlich niemand ent Haus geloss on stehle, wie das en de schwere Zeide oft passeert es.
Wie die Russe rennkomm senn, es ne dem Zaldaat ant Gwehr ghoppst, dass de gaar nex meh hat mache khenne. On wie onser Kolonist mol mei Großvatr hat schlaan welle, es onser Fritzi an ne gschprong on Schluss waar seit dann met dem seiner Aangriffsluscht.

Awer onser Fritzi waar all denne, wo stehle han welle, zu gfährlich on sie han et aa zum drettemol proveert, ne zu vergifte – on dasmol es et ne gelung. De Dr. Haupt hat alles proveert, awer et waar zu spoot, et waar nex meh zu mache. Aa onser Träne han nimmi gholf on traurich waare mr all. Hinne an de Sprauhitt han mer ne onsrer Erd iwergenn.

Ja, de Fritzi waar wie mei Großvatr: Stolz, couragiert, trei on standhaft, drom sen se mr alle zwaa so lebhaft en Erinnerung geblieb on werre aa bleiwe, solang wie ich lewe...



Beiträge - zuletzt aufgerufen